Vushtrria është një ndër qytetet më të vjetra në Kosovë dhe ndodhet në pjesën veriore të Republikës së Kosovës.

Vushtrria e sotme më herët është quajtur Vicianum, e më vonë edhe Vuçitrn (në serbisht). Sipërfaqja e tërësishme e saj përfshin 345 km². Në kuadër të kësaj komune hyjnë 66 fshtra të lidhura në mes veti me një infrastrukturë rrugore relativisht të zhvilluar.

Qyteti i Vushtrrisë njihet që nga mesjeta e hershme dhe konsiderohet se i tërë qyteti ishte i ndërtuar në breg të lumit Bistrica i cili sot është krejtësisht i tharë. Mbetjet arkeologjike nga mesjeta krijonë përshtypjen se Vushtrria ka qenë një qendër e rëndësishme administrative në të kaluarën.

Gjuhë zyrtare janë shqipja dhe serbishtja, dhe pas 2008 edhe gjuha turke.

Mbërritja

Ky qytet është i pozicionuar në veri prej Prishtinës dhe në jug të Mitrovicës; arrihet përmes magjistralës Prishtinë-Mitrovicë.

Vizito

Ura Osmane/ Ura e Vucitrnit është një mbetje e rëndësishme arkeologjike për Vushtrinë, ajo mund të vizitohet edhe sot dhe definitivisht mbartë një madhështi në vete. Kjo urë ishte ndërtuar në mënyrë si rrugëkalim mbi lumin Bistricë.

Pikë tjetër interesante për tu vizituar është Kështjella në qendër të qytetit. Pamja e saj e thjeshtë duket magjike në prezencë të arkitekturës së re dhe asaj komuniste që e rrethon. Kjo Kështjellë është e hapur për vizitë çdo ditë. Nëse niseni prej aty në pjesën e vjetër të qytetit do të ballafaqoheni me tensionin e rrugëve të ngushta, shtëpive të vjetra nga fillimi i shek. XX dhe natyrisht ndërtimeve të reja rezultat i shkatërrimeve të luftës së fundit.

Shetitja nëpër rrugët e Vushtrisë ka tendencë të jetë e mundimshme si rezultat i rrugëve shumë të ngushta dhe komunikacionit kaotik.

Karakteristikë tjetër e pjesës së vjetër të qytetit është Hamami i Ali Beut, gjithashtu mbetje nga mesjeta, banjë publike e stilit osman dhe një nga më të vjetrat në Ballkan.

Vushtrrinë e përshkojnë Lumi Sitnica, si lumi më i madh, që përshkon tejpërtej territorin e Komunës, ndërsa dy lumenj më të vegjël : Tërstena dhe Studimja, kalojnë nëpër qytetin e Vushtrrisë.